Seponesa se batla babelaellwa kamora hore mabenkele a tlatlapuwe!

Mmelaellwa ya dilemo di leshome le metso e robedi o tshwerwe, ha babelaellwa ba bang ba babedi ba ntse ba tsongwa ka mora boshodu ba mabenkele motseng wa Bultfontein.

Sebuelli sa seponesa sa Lejweleputswa, mokapotene Stephen Thakeng o re, lebenkele le leng le ile la hlaselwa ke babelaellwa ka dithipa, mme baahi ba motse ba ile ba lelekisa babelaellwa ba bararo mme ka lehlohonolo ba kgona ho tshwara mmelaellwa a le mong.

Ho bolelwa hore maobane mantsiboeng, Dawit Bambore ya dilemo di 30 o ne a sebeletsa bareki ha ngwana a tla lebenkeleng ho tla batla dintho tse monate.

Ha ba bula lemati la mashodu, banna bao ba bararo ba Maafrika ba ile ba kena ka lebenkeleng ba hlometse.

“Mmelaellwa e mong ya neng a nkile thipa o ile ae toboketsa molaleng wa monga lebenkele ha babelaellwa ba babedi ba ntse ba nka bakete ya dibisikiti, dipakete tse robedi tsa disakerete tsa mefuta-futa le tjhelete e ngata e sa bolelwang,” ho boletse Thakeng.

Mmelaellwa o ile a baleha sebakeng seo ka mora moo.

Mmelaellwa ya ileng a tshwarwa ke baahi, o ile a tshwarwa ke seponesa, mme o tobane le qoso ya boshodu ba kgwebo le ho ba le sebetsa se kotsi.

Maponesa a kgothaleditse baahi ho itlhahisa haeba ba na le lesedi le ka tshwarang babelaellwa ba babeli ba setseng.

“Ba ka etsa jwalo ka ho ikopanya le lefokisi, Thapelo Maleka wa Bultfontein ho 072 966 1659 kapa ba letsetse nomoro ya tshohanyetso ya seponesa ho 08600 10111.