Seponesa se batlana le babelaellwa boshodung ba kgwebo sekolong se tlase sa Trio

Seponesa sa Maokeng, Kroonstad, se kopa thuso mabapi le ho fumana babelaellwa ba amehang boshodung ba kgwebo sekolong sa boemo bo tlase sa Trio ka Mantaha wa la Phupu 5.

Hoya ka mmuelli wa seponesa seterekeng sa Fezile Dabi, sajene Josephine Rani, motletlebi o qositse hore one a ile sekolong hoya lata difaele, moo a ileng a fumana sepatjhe sa dipene sele ka ntle ho phapusi ya boithutelo.

“Motletlebi o tswelletse ho qosa hore o ile a elellwa hore e nngwe ya difensetere ene e thubehile ha enngwe e silwe e butswi,” ho bolela Rani.

Ka mora hobona tseo tsohle, leho hlokomela hore hona lethepha e utsuweng, mosuwetsana o ile a founela seponesa.

Thepa e utsuweng e kenyelletsa komporo ya moetso wa HP, mochini wa kgatiso, seyalemoya sa puisano sa letsoho, sepikara sa Bluetooth se senang mohala ha mmoho le mochini o apesang pampiri ka polasetiki.

Ho ya ka Ranithepa ena ena le boleng bo ka bang ba R9 000.

“Seponesa se kopa thuso hotswa setjhabeng mabapi leho fumana babelaellwa kapa mang-kapa-mang ya rekisang thepa e belaellwang ele e utsuweng.

Lefokisi Ramorakane a ka letsetswa dinomorong tsa 0670375265.” ho tsebisa Rani.

Mokhomishinara wa nakwana seterekeng sa Fezile Dabi, Brigadier Mapulane Mbeloane, o hatisitse hore ho reka thepa ya boshodu ke tlolo ya molao, mme sechaba se tlohele ho tshehetsa baetsi ba molato ona ka ho reka thepa ya bona.

“Re ka se tlohele bokamoso ba thuto ya bana ba rona e senyehe ka lebaka la boshodu.

Re tlameha ho tshwarana ka matsoho ho lwantsha diketso tsena tsa tlolo ya molao,” ho bolela Mbeloane.