Marumo Gallants e fallela Profenseng ya Foreisetata semmuso, empa eseng jwalo ka Bloemfontein Celtic

Maiteko a ho reha Marumo Gallants ka lebitso la Bloemfontein Celtic ke toro e fetileng ka tsela, sena se tla kamora hore sehlopha se reke boemo ba Moroka Swallows ka maikemisetso a ho reha sehlopha ka lebitso la Siwelele Sa Masele – Bloemfontein Celtic.

Ho latela ditlaleho tse fetileng, ho ile hwa e ba le menyenyetsi ya hore Bahlabane Bantwa ba ne ba le mothating wa ho reha sehlopha sa Limpopo ka Celtic, empa monga Celtic, Max Tshabalala o ile a fana ka tlhahiso ya R5 million bakeng sa ho ba monga sehlopha seo, se bakileng ho qhalana ha dikamano dipakeng tsa Gallants le Bloemfontein Celtic.

Celtic e ile ya rekisetswa ho sehlopha sa Kwazulu-Natal Royal AM ka selemo sa 2021.

Ka Labobedi hoseng, 11 Phupu, sehlopha se phatlaladitse hore se na le konteraka ya dibapali tse 13 tse neng di bapalla Moroka Swallows – The Dude Birds nakong ya letsholo la 2023/24.

Dibapadi tse ding di rekisitswe hammoho le maemo a bona a NFD.

Sehlopha se tla fana ka lenane le felletseng la sehlopha hang ha konteraka e phethilwe.

Mokwetlisi, Dylan Kerr, ya kgutlileng Afrika Borwa bekeng e fetileng o kile a kwetlisa Dinonyana tsa Dube.

Dibekeng tse mmalwa tse fetileng, Gallants e phatlaladitse ho kgutlela ha bona maemong a hodimo a bolo ya maoto Afrika Borwa ka mora ho reka boemo ba PSL ho dinatla tsa pele tsa Soweto.

Ho feta moo, sehlopha se tla tswelapele ho bapala tlasa folakga ya Marumo Gallants, mme dipapadi tsa bona tsa lehae di tla bapallwa Lebaleng la Dr Petrus Molema, le Lebala la Toyota bakeng sa dipapadi tse kgolwanyane.