Babelaellwa ba bararo ba tshwerwe Parys ka boshodu ba kgwebo

Babelaellwa ba bararo ba dilemo tse pakeng tsa 32 le 48 ba tshwerwe ka boshodu Parys.

Seponesa sa Parys, se tlalehile hore ka Sontaha sa la 9 Mphalane, nakong ya mantsibuya, horeng ya bosupa efetile ka metsotso e mashome a mararo, ba belaellwa ba ba hlano ba neng ba hlometse ba ile ba kena ka lebenkeleng mme ba batla tjhelete le disakerete.

Mmuelli wa seponesa sajene Josephine Rani wa setereke sa Fezile Dabi District o re, babelaellwa ba ile ba supa monga lebenkele ka sethunya, ha babelaellwa ba bang bane ba ile ba phunya lebenkele, mme ba nka disakerete, mehala e mmedi le tjhelete e ngata e sa bolelwang.

“Babelaellwa ka mora moo ba ile ba baleha sebakeng seo ka koloi ya sedan e putswa ka mmala,” ho tlaleha Rani.

Ka Laboraro, la 12 Mphalane, hoo e ka bang ka hora ya borobedi bosiu, lekala la Provincial Organised Crime le sehlopha sa seponesa sa Bloemfontein Public Order, se ile sa fumana lesedi le ba lebisitseng ho Zamdela ntlong e nngwe le ho tshwara babelaellwa ba bararo.

E mong wa babelaellwa o bile a amahanngwa le boshodu ba koloi e utswitsweng Sasolburg nakong ya boshodu ba ntlo ka Lwetse.

Babelaellwa ba bararo ba tla hlaha ka pela Lekgotla la Maseterata la Parys ka Mantaha wa la 17 Mphalane
ka diqoso tsa boshodu ba kgwebo.