Radithethefatsi o fellwa ke mahlale!

Monna ya dilemo Di 32 ya dulang Tempest str, Dagbreek, Welkom, o tshwaretswe ho hweba Ka dithethefatsi tsa mefuta, Ka la 19 Mmesa 2024, dihoreng tsa leshome hoseng.

Ditho tsa sepolesa sa Welkom se tsebahalang e le K9 Unit le Counter Narcotics, di fumane tshedimoso mabapi le thekiso ya dithethefatsi Dagbreek, Welkom.

Ho tlalehwa ha mmelaellwa enwa ya dilemo di 32, a hweba Ka dithethefatsi.

Sepolesa se ile sa latela tshedimoso ena, mme ya se lebisa ntlong ya mmelaellwa, moo ho yona Ditho di ileng tsa fumana dithethefatsi tsa boleng ba R3000 teng.

“Ntlong eo, re fumane Crystal Meth, diphuthelwana tse robedi tsa dithethefatsi, mme sephuthelwana ka nngwe se tshetse dipidisi tse 1000 tsa Mandrax . Re boetse re fumane diphuthelwana tsa tjhelete ya pampiri; lengolo la tswalo; lengolo la ho kganna le bukana ya boitsebiso,” ho boletse mmuelli wa sepolesa sa Lejweleputswa, Stephen Thakeng.

Ho tlalehwa ha mmelaellwa a ne a iphile dimenyane, empa sepolesa se ile sa mo tsoma ho fihlela se mo fumana ha morao hona Welkom.

Mmelaellwa enwa o tla hlaha ka pela Lekgotla la dinyewe la Maseterata la Welkom tsatsing lena le hodimo.