Monna ya dilemo di 29 o tshwerwe ka ho rekisa matekwane

Seponesa sa Thabong se tshwere monna ya dilemo di 29 ka ho rekisa matekwane lekeisheneng la Thabong maobane hoseng, kala 27 Phupu.

Hoya ka mmuelli wa seponesa seterekeng sa Lejweleputswa, mokaptene Stephen Thakeng, seponesa se fumane tsebiso ya ditaba tsa motho ya rekisang matekwane di hostele ya A.

“Ho fihleng ha maponesa, ba kopane le monna wa moAfrika ya dumelletseng maponesa ka hara ntlo ya hae,” ho tsebisa Thakeng.

Maponesa a fumane mekotla ya matekwane e boima bo kabang 1 540kg.

Matekwane a mang a ne a le ka hara dipolasetiki ka kamoreng ya ho robala. Hara tsena, maponesa a fumane tjhelete e sa bolelwang ka palo.

“Monna enwa o ile a tshwarwa hang-hang mme, o lebelletswe hotla hlahella ka pela lekgotla la Welkom hosane, ka la 29 Phupu mabapi le thekiso ya matekwane,” Thakeng wa tlaleha.