Moditjhaba ya seng molaong (47) o tshwerwe ka dikgomo tse 14 tse utsuweng

Sesponesa sa Odendaalsrus sa sehlopha sa Boshodu ba Mehlaphe le Mefuta e Kotsing ya ho Fela, ha mmoho le seponesa sa Welkom sa Taolo ya Setjhaba, se sebedisitse tlhahisoleseding e amohetsweng ke sehlopha sa Crime Intelligence ho tshwara monna wa moditjhaba ya senang ditokomane ka dikgomo tse 14 tseo ho belaelwang di utsuwe maobane thapama.

Ho ya ka mmuelli wa seponesa seterekeng sa Lejweleputswa, mokapteni Stephen Thakeng, ho bonahala ha dikgomo tseo di utsuoe polasing e Hennenman.

“Ka mora moo, rapolasi o ile a ngolisa nyewe ya boshodu ba dikgomo e ileng ya abelwa lefokisi Coen de Beer wa sehlopha sa Boshodu ba Mehlaphe le Mefuta e Kotsing ya ho Fela sa Odendaalsrus,” ho tsebisa Thakeng.

Dikgomo tse utsuweng di na le boleng ba R280 000.

Ka baka la letsholo lena, mmelaellwa ya dilemo di 46 o ile a tshwarwa ka dikgomo tse belaellwang di utsuwe. Ho feta moo, mmelaelloa o ile a iponahatsa e le moditjhaba ya seng molaong.

“Re na le tshepo ya hore haufinyane ho tla tshwarwa batho ba bang,” ho boletse Thakeng.

Mmelaelwa o tla hlaha ka pele ho lekgotla la dinyewe la Hennenman hosane a tobane le ho fumanwa ke dikgomo tseo ho belaellwang di utsuwe; boshodu ba leruo le bojaki bo seng molaong.

Mokhomishenara oa setereke sa Lejweleputswa wa nakwana, Brigadier Mzondi Mojafi, o ile a thoholetsa baahi le mapolesa ka ho fana ka tlhahiso-leseling le karabelo e potlakileng ka ho latellana.