Moqosuwa o fumanwe a le molato ka hoba le sethunya se seng molaong

Moqosuwa Daniel Mathebula (41) o hlahile ka pela lekgotla la dinyewe la sedika sa Petrus Steyn maobane, kala 26 Phupu, moo a ileng a ahlolelwa hoya tjhankaneng ka mora ho fumanwa ka sethunya le dikulo tse seng molaong.

Mmuelli wa lekala la di Hawks porofensing ya Freisetata, mokaptene Christopher Singo, o boletse hore Mathebula o tshwerwe selemong sa 2020 kala 11 Hlakola.

“Tshwaro ya moqusuwa e tlile ka mora tletlebo ya tshenyo ya thepa ya bohlokwa seponeseng sa Petrus Steyn,” ho hlalosa Singo.

Maponesa a ile a ya sebakeng se hlalositsweng polasing e Stilfontein, moo ba fumaneng mmelaelwa ka dikarolo tsa dithapo tsa seporo sa terene tse kgaotsweng.

“Seponesa se fumane mmelaelwa a na le sethunya le dikulo tse seng molaong,” Singo wa tsebisa.

Mmelaelwa o ile a tshwarwa hang-hang, ebile a nehelwa lekaleng la di Hawks la diphuputso tsa botlokotsebe bo hlophisitsweng, Welkom.

Lekgotla le ahlotse Mathebula hoya hlola dilemo tse tsheletseng tjhankaneng, empa tse nne di tlositswe bakeng sa hore, ene one a soka a fumanwa ka tlolo eo ya molao pele.

Moqosuwa o tla hlola dilemo tse ding tse pedi tjhankaneng mabapi le ho fumanwa ka dikulo tse seng molaong.

“Hona ho bolela hore Mathebula o tla hlola dilemo tse tsheletseng tjhankaneng, hoba diqoso tsa tshenyo ya thepa e bohlokwa di tlositswe,” ho rialo Singo.