MEC Bulwane le MEC Qabathe, batlo tshwara Imbizo ya thibelo ya botlokotsebe

Ka ha botlokotsebe le tlolo ya molao di jele setsi profinsing ya Foreistata, MEC wa seponesa le dipalangwang William Bulwane le MEC wa ntlafatso ya setjhaba Mamiki Qabathe batlo etelela motse wa Bloemspruit moo teng batla be ba tshwere Imbizo mabapi le thibelo ya botlokotsebe.

Maikemisetso a Imbizo ke ho matlafatsa twantsho ya botlokotsebe le ho aha maqhama a setjhaba.

Ma-MEC ka bobedi ba dumela hore setjhaba se na le seabo sa bohlokwa ho thusa seponesa, le ho kgothaletsa tshepo setjhabeng mabapi le ntwa kgahlanong le botlokotsebe le ho kenya tshabo ho dinokwane.

“Sepheo sa Imbizo ke ho buisanaka ditaba tse amanang le botlokotsebe tse amang batho ba dulang sebakeng sa Bloemspruit hammoho le baahi ba Mangaung Metro Municipality ka kakaretso,” ho boletse mafapha ka bobedi polelong ya boraditaba.

“E boetse e ikemiseditse ho kopanya mehopolo le ho rala merero ya ho thusa seteishene sa seponesa sa Bloemspruit kaha se nkuwa e le se seng sa diteishene tse hodimo-dimo tse 30 naheng ka bophara ka tekanyo e phahameng ya tlaleho ya ditlolo tsa molao,” ho bala phatlalatso ya ditaba.

Ho lebeletswe hore bankakarolo ba bang ba amehang jwalo ka seboka sa lehae sa seponesa sa (CPF),
SAPS le dihlopha tse ding tsa setjhaba ba tla ipontshahatsa ka tsatsi la Imbizo ka labone, Sports field pela Diteboho Tavern, Phase 6, Bloemspruit, Mangaung.