Majoro wa Matjhabeng: Khalipha o dula a kentse thupa ka metsing

Majoro wa mmasepala wa Matjhabeng Thanduxolo Khalipha o qoswa ka tlhaselo le ditshoso mane Motseng wa Thabong, Welkom.

Tsena kaofela di nkile sebaka ka la 15 Motsheanong monongwaha, ho ella dihoreng tsa bo 09:46 hoseng.

Monna ya dilemo di mashome a mane a metso e mehlano, o tlalehile ketsahalo ena sepoleseng se haufi mme nyewe ya tlhaselo le ditshoso ya bulwa.

“Ke tiisa hore monna ya boletsweng o re o kgohluwe phatleng le sefubeng ka monwana ke mmelaellwa. o boetse are mmelaellwa o entse ditshoso tsa ho ka bolaya lehlasipa ha feela asa etse hore a hlomphehe jwalo ka ramotse wa phethahatso,” ho boletse mmuelli wa sepolesa sa Lejweleputswa Stephen Thakeng.

Nyewe ena e bulwa hodima enngwe e butsweng ka Mmesa hona selemong sena se hodimo, moo mmelaellwa a ileng a qoswa ka tlhaselo le palo tse pedi tsa tlolo ya molao.

Ho fihlela ha jwale, ha hona motho ya lletsweng ke ditshepe, mme dipatlisiso di ntse di tswella pele.