Batho ba makgolo Thabong ha ba na metsi ka mora ho phatloha ha peipi

Mosebetsi wa kaho ya ditsela lekeisheneng la Thabong, Welkom o eme kamora ho phatloha ha peipi ya metsi, e siileng baahi le dikgwebo dibakeng tse fapaneng tsa Thabong ba hloka metsi ho tloha mafelong a beke.

Puisanong ya hae le seea-le-moya sa Lesedi FM tsatsing la kajeno, Phupjane 10, Majoro wa Mmasepala wa Matjhabeng, Thanduxolo Khalipa, o re balaodi ba Toropo ba bitseditswe setsheng ho latela ho dutla ho neng ho lemohuwe peiping ya metsi ya Thabong e tswang metsi a mangata ka bophara ba dimilitara tse 1 000 (mm).

“E, ke tiisa hore baahi ba Thabong hajwale ha ba na metsi ka mora ho phatloha ha peipi e fepelang metsi sebakeng seo, leha ho le jwalo, re sebetsa bosiu le motshehare ho rarolla bothata bona, mme ka hona re tiisetsa baahi ba rona hore metsi a tla kgutliswa, re tsebisa baahi hore hamorao thapameng ena horeng ya bohlano (5pm) kapa horeng ya bone (4pm),” ho rialo Khalipa.

Mmasepala o tlaleha hore ho hlophisitswe ditanka tsa metsi tse ileng tsa romellwa dibakeng tsa Thabong.

“Ho fokotsa haello ya metsi, ditanka di kentswe leralong ho thusa setjhaba ka metsi,” ho boletse Khalipa.

Moahi ya tshenyehileng haholo e leng mme wa bana ba babedi, Bafedile Seabi, a re tlhoko ya metsi ke ntho e tshwenyang haholo.

Moemeli wa setjhaba, e leng Nkoanyane Nkoanyane o tsebisitse Kasi Voice News hore boemo bo mahlonoko mafelong a beke kaha batho ba fetang 50 000 ba qetile mafelo-beke ba se na metsi.

“Ke kemiso e kgolo. Re bile le bothata bona hotloha lemo se fetileng, le ka Hlakubele selemong sena hape re sena metsi,” ho boletse Nkoanyane.