Boqhekanyetsi ba peterolo: Lepolesa le basebetsi ba seteishene sa peterolo ba llelwa ke ditshepe

Lepolesa la Foreistata le sebeletsang seteisheneng sa sepolesa sa Lindley, hammoho le basebetsi ba bane ba setsi sa peterolo ba lletswe ke ditshepe ka mora ho nkga lefotha nyeweng ya boqhekanyetsi Lindley.

“Lepolesa le dilemo di 53,le qoswa ka ho sebetsa le basebeletsi ba setsi sa peterolo ho tloha ka Pherekgong ho fihlela ka Phato 2022 ho qhekanyetsa sepolesa sa Afrika Borwa.

Ba tshwerwe ka labobedi, 2 Mmesa 2024, Lindley, ke lekala la mautlwela la di Hawks Bethlehem,” ho boletse muelli wa di-Hawks Foreistata, Christopher Singo.

Ha a manolla ditaba, Singo o hlaloseditse Kasi Voice News, hore babelaelwa ba bahlano mme ba kenyeleditse le lepolesa ka hare ba pakeng tsa dilemo tse 47 le 67.

O tswetse pele hore e ne e le ka 2022 ha motsamaisi wa seteishene sa sepolesa sa Lindley, a belaella tshebediso e ngata ho feta tekano ya tjhelete ha ho tshelwa peterolo.

“Ka Hlakola 2022, ho ile ha hlahlojwa dikoloi tsa mmuso tse ka tlasa sepolesa sa Lindley.

Mme ho ile ha fumanwa ho tshetswe peterolo e ngata ho feta tekano dikoloing tse ding.

Taba ena e ile ya tlalehelwa lekala la mautlwela la di Hawks Bethlehem bakeng sa ho etsa diphuputso tse ding” ho rialo Singo.

O re diphuputso di utullotse hore ofisiri e dilemo di 53 o ne a sebedisa dikarete tsa peterolo tsa mmuso tse fapaneng a etsa e ka o tshetse peterolo dikoloing tse fapaneng tsa mmuso leha di ne di setse seteisheneng sa sepolesa Lindley.

O tswetse pele hore, “ho fumanwe hore o ne a etsa boqhekanyetsi bona ka thuso ya basebeletsi ba seteishene sa peterelo.

Ka baka la boqhekanyetsi boo sepolesa sa Afrika Borwa se lahlehetswe ke tjhelete e kaalo ka R46 911”.

Babelaellwa ba tla hlahella lekgotleng la dinyewe la masetereta wa Reitz ka Labone, 4 Mmesa 2024 .

Ba tla be ba tobane le diqoso tsa boqhekanyetsi, boshodu le ho roba molao.