Bobodu bo bong hape bo tobane le NSFAS

Sekema sa Naha sa Thuso ya Ditjhelete ho Baithuti (NSFAS), e leng lefapha la thuso ya ditjhelete e reretsweng ho thusa baithuti ba ditheong tsa thuto e phahameng e sisintsweng ke diqoso tse ntjha tsa bobodu.

Tlaleho e lokollotsweng ke Organisation Undoing Tax Abuse (Outa) bekeng e fetileng e fumane hore NSFAS e nyatsitse maano a ho thapa ba fanang ka ditshebeletso bakeng sa bodulo ba baithuti.

Tlaleho e boletse hore ha se feela hore CEO e lelekuweng, Andile Nongogo o ne a le teng ha dik’hamphani tsa boipelaetso di ne di fana ka dipuo ka pela komiti ya tekolo ya ditjhelete, o ile a boela a bua ka tsona.

Tlaleho e boetse e fumane hore difeme tse ding tseo e leng tsa batsamaisi ba Coinvest – e leng e nngwe ya dik’hamphani tse nne tsa fin-tech tse hokahaneng le dithendara tse tsosang kgang le tse hlakotsweng hona jwale tsa ho fana ka tefo e tobileng ya ditsiane tsa ho phela ho baithuti ba NSFAS – le bona ba fuwe dithendara tsa bodulo.

Batsamaisi ba dik’hamphani tse pedi tse ileng tsa fuwa dithendara tsa ho fana ka portal ya marang-rang ya bodulo ba baithuti, ho boletse tlaleho, hape ba kgethilwe ka hara phanele ho fana ka tumello ya bafani ba marobalo a baithuti le ho ba le matlo a baithuti.

Batsamaisi ke Kwasi Asare-Baah le Ebenezer Kwamena Smith, ba Profecia IT.

“E mong wa batsamaisi ba Profecia IT, Ebenezer Kwamena Smith, hape ke mookamedi wa dik’hamphani tse ding tse pedi, Adam Fae le Fort Brook. Motsamaisi e mong, Kwasi Asare-Baah, hape ke motsamaisi wa Fort Brook.

Adam Fae hape o kgethilwe jwaloka moemedi wa tumello ya bodulo wa NSFAS mme Fort Brook e le mofani wa bodulo wa NSFAS,” ho boletse Outa tlalehong ya yona.

“Lekgetlong lena, bona batho ba kgethetsweng ho theha sethala sa marang-rang sa bodulo ba baithuti, moo bafani ba marobalo ba thathamisang thepa ya bona, le bona ba kgethilwe jwalo ka baemedi ba tumello ya bodulo ba baithuti.

Baemedi ba tumello ya bodulo ba baithuti ba hlahlobang thepa e thathamisitsweng sethaleng sa Marang-rang ba na le thepa e ngodisitsweng ka molao mme e bapatswa sethaleng seo ba iketseditseng sona,” ho boletse tlaleho.