Mopresidente Ramaphosa o tlohela leeto la ho leba WEF ho sebetsana le kgaello ya motlakase

Mopresidente Cyril Ramaphosa o hlakotse merero ya hae ya maeto a ho ya Davos, Switzerland, e le ho sebetsana le bothata ba hona jwale ba ho kgaoha ha motlakase ka hara naha.

Sena se phatlaladitswe ke mmuelli wa Mopresidente, Vincent Magwenya, ka Sontaha maobane mantsibuya.

Mopresidente o ne a lokela ho etella pele moifo wa Afrika Borwa ho ya Davos ka Labobedi, eleng hosane, le ho nka karolo diketsahalong tse mmalwa tse amanang le kopano ya selemo le selemo ya Foramo ya Moruo wa Lefatshe (WEF), ho kenyeletswa dipuisano mabapi le moruo wa Bophelo bo botle ba basadi le dijo tsa selemo le selemo tsa kamohelo tse neng di tshwerwe ke Moprofesa Klaus le Hilde Schwab.

“Ka lebaka la bothata bo ntseng bo tswela pele ba eneji, Mopresidente Cyril Ramaphosa o hlakotse leeto la hae la tshebetso ho Seboka sa Moruo sa Lefatshe Davos. Hajoale, Mopresidente o bitsa kopano le baetapele ba mekga ya dipolotiki e emetsoeng ka Palamenteng, NECCOM [National Energy Crisis Committee] le boto ea Eskom,” Magwenya a rialo.

Magwenya o itse Mopresidente Ramaphosa o lebeletswe ho tshwara dikopano tse mmalwa tse mabapi le bothata ba motlakase.

“Mopresidente Cyril Ramaphosa o se a ntse a buisana le boetapele ba Eskom le National Energy Crisis Committee (NECCOM) mme dikopano tseo di tla tswela pele.

Dikopano tse ding tsa dipuisano ho bankakarolo ba bohlokwa di tla tshwarwa bekeng ena e tlang,” ho boletse Magwenya.

Mathata a phepelo ya motlakase setsing sa motlakase a fihlile maemong a tlokotsi bekeng e fetileng ha setsi sa motlakase se phatlalatsa hore se tla kenya ts’ebetsong Mokhahlelo wa 6 wa ho fokotsa motlakase ho fihlela tsebiso e nngwe ka mora hore dikarolo tse 11 tse fehlang di robehe hoseng.