Mopresidente Ramaphosa o phatlalatsa 27 Tshitwe e le letsatsi la phomolo la setjhaba

Ka polelo ya phatlalatso, Mopresidente Cyril Ramaphosa o phatlaladitse hore ka la 27 Tshitwe, e tloba letsatsi la phomolol la setjhaba, sebakeng sa Letsatsi la Sontaha la Keresemese.

Sena se tsamaelana le Karolo ya 2(a) ya Molao wa Matsatsi a Phomolo a setjhaba (Molao wa 36 wa 1994).

Ho ya ka almanaka ya 2022, Letsatsi la Keresemese le wela ka Sontaha ka hona Mopresidente o bone ho loketse ho phatlalatsa la 27 Tshitwe e le letsatsi la phomolo la setjhaba.

“Karolo ya 2(1) ya Molao wa Matsatsi a Phomolo a Setjhaba e fana ka hore “nako le nako ha letsatsi la phomolo le wela
ka Sontaha, Mantaha o latelang e tla ba letsatsi la phomolo,” ho tlaleha Mopresidente.

Haeba letsatsi la phomolo la Sontaha, la 25 Tshitwe le ne le ka fetisetswa ho Mantaha wa la 26 Tshitwe, sena se ka hlakola matsatsi a phomolo a la 26 Tshitwe kapa ho baka matsatsi a mabedi a phomolo – e leng karolo ya matsatsi a phomolo a 12 a lefellwang selemo le selemo – ho kopana.

Sena se bolela hore basebetsi ba tla ba le matsatsi a phomolo a 11 a lefellwang selemong sena, athe Karolo ya 5 ya Molao wa Matsatsi a Phomolo a setjhaba e fana ka hore “… mosebeletsi e mong le e mong o tla ba na le tokelo ya ho ba nale palo ya matsatsi a phomolo a setjhaba jwalo ka ha ho hlalositswe Molaong ona.”

Ka lebaka la maemo a ikhethileng ho potoloha almanaka ya 2022, le ho tshehetsa metheo le mekgwa e amehang ya melao ya basebetsi, Mopresidente Ramaphosa o boletse Labobedi, la 27 Tshitwe, e le letsatsi la phomolo sebakeng sa Letsatsi la Keresemese.

MaAforika Borwa a tla beng a sebetsa nakong ya matsatsi a phomolo a amohetse ditaba tsena ka nyakallo.